Sunday, May 27, 2007


آه يا شطوط التوت شعر/ سمير الأمير

***
اه يا شطوط التوت
نفسى ادوق تانى طعم الحواديت
واشم ريحة البيوت
نفسى انام ع الفرن زى زمان
فى حضن العجين..الأمان
العجين.. الحنان.

يادى الحنين الجنان
يادى الحنين اللى خدنى من سنين
داست على وش السنين
من بعد اللى فات فى القلب
جفف خلايا الروح
انا دلوقتى مين؟


يمكن أكون مدبوح ومش دريان؟
طب سندونى ع الوجع يمكن
أكون عيان ...

أيوه أكيد عيان ما نيش ميت
مادمت لسه باحس بالماضى
وبحن للى جى
وببص حواليا ومش راضى
الحزن ده يشهد بإنى حى
الحزن ده يشهد بإنى حى







ردْح شعبى من تُراث القهر



شعر/ سمير الأمير












ردح شعبى من تراث القهر

أنا باعتذر للشعر قبل ما اقول
اللى حقوله مش من فنون القول
ده ردح شعبى من تراث القهر
من كتر غلب الفقير وطول سنين الفقر
ومن صنايع زمن احنا اللى أزمناه
لما اتذعرنا قصرنا فطولناه
ومن اعتياد الظلم يوماتى
لما بقينا قرود والظلم قراداتى
اسمع بقى وصلى ع اللى يشفع فيك:_

خيبتك تقيله بس عامل ديك
ف وسط عيله كلها نسوان
وشلت شيله حتماً ماهياش ليك
نيّلتها بنيله دخنتها بدخان
وكل مرة تشد تعسيله
لما النفير يزعق ف وسط الميدان
متنطط؟ طب قولى بتعمل إيه؟
وأسد عليّا وفى الحروب أرنب
فرق "ابن زين" م "الحصين"
مش حرف بس يابيه
شتان ما بين الكلب والتعلب
والله ما عرف حتى شتان ليه؟
إذا كانوا أصلاً جميعاً كلهم مقلب
مقلب زباله استحاله يبقى فيه ورده
"صاحبك" صدمنى كنت فاكره زعيم
فجأه أختفى وساب الغنم شارده
صنف العساكر صنف واطى لئيم
وبياعين أوطان وبياعين خُرده
كل انتصارهم ف الأساس تسليم
و"أم المعارك" واختها ف البيان
المكرفون أفيون والشعب كييفه
من كتر حزنه أدمن الأحزان
لزق الجرب ع الروح وتفيد بإيه الليفه؟
تاه البشر ف البقر و الرُز ف البرسيم
عيال بتحكى ف حاجات عمرها ما شافتها
وعيال ناقصها علام وبتفتى ف التعليم
وعيال ف تانيه ابتدائىبترسم سياستها؟؟


---------------------------------
















يامحنى إيدنا بالدم

يا محنى إيدنا بالدم
يا مكربسنا ف نفق الليل
مين يقدر ع الغوله يا عم
والشطار رابطين الخيل
احسب فرق الكيف والكم
واضرب فوق الراس والديل
واوعى تكون أهبل تتخم
ديل القهر مركب ديل
كل ماتيجى الناس تتلم
بعد ماتزهق حط وشيل
بعد ماتشبع غلب وغم
يطلع واحد دمه تقيل
يعمل أب ويعمل عم
شرع شيطانى بالتأويل
جوز الخاله وجوز الأم
بلع الدلتا وشفط النيل .
***********
يامحنى إيدنا بالتار
سلحنا بالنور والنار
واطلقنا من سجن الخوف
وادى الفُقرا خيول وسيوف
واوعى تعد، الفقرا كتار.

حسرة قلبك يوم ماتشوف
كل الكدب صبح مكشوف
بالمقلوب على ضهر حمار
تطلع صورتك فى الأخبار
ترجع خالتى وامى اخوات
مصر تعيش فى تبات ونبات
وتفتح تانى الأزهار

يامحنى ايدنا بالحنه
ابنيلنا وعلى ف الجنه
وادى الغوله بيت ف النار
جنب العسكر والتجار.

-----------
















فكره

أنا جاتلى فكرة انى اخترع قنبله
تثير العواطف والتعاطف والشجن
يمكن اقدر ياحبيبتى انى ابوسك ف الميدان
تحت ساتر م الحنان
بس يلزمنى كمان لما تلحقنا العساكر
انى اغطى انسحابك وانسحابى.
ياه......يا خرابى!
كل ده علشان ابوسك!
امال ايه يلزم بقى لو جنونى زاد شويه
ومس عصب العشق فيَا
وغصب عنى لقيتنى عايز احضنك؟









-----------









صوره

الناس ع القهوه عنيهم على رجلين اللعيبه
وقلوبهم بتلف مع الكوره
الا الواد محمود
قاعد بره القهوه لوحده
لكن كل مشاعره
بتزحف ناحية حارة"أحمد حجى"
مستنى عزيزه أم الوش القمر
اللى مخلينى انا شخصياً اتحسر على عمرى
تطلع تدلع وتحط القله ف الشباك
وساعتها قلب الواد محمود
هينط ويجرى هناك
يتشعبط ع الحيطه ويصرخ
" ياعزيزه انا عطشان اسقينى"
وانا طبعاً يسعدنى ويكفينى
ان عزيزه تحس بحب الواد محمود
علشان يطمن قلبى ويتأكد ان الدنيا لسه بخير
وان إله الكون حى وموجود.














==========


ما تعلقوش حلمكم بيّا
أنا بين بنين
بحرين من ضلام وندعتين من ضى
على مشارف سكتى طوابير من الحزنانين
والمغلوبين على أمرهم
مادين إيديهم يمّتى وكأنى المسيح الحى
ما يعرفوش إن انا خشب الصليب؟
ما يعرفوش إن انا برئ من دم النبى
ومش برئ؟
برئ كمان من كلمتى وجبان؟
ملعون بذنبى وذنب المخدوعين فيّا
إنسان بسيط وشيطان,
مجنون وباتقلب مابين صباعين
فى إيدين زمن مقلوب على نفسه
ومش مضمون.. خفيف
كما رملا يه ف الصحرا
محكومه بالريح القوى وبالريح الضعيف؟
يأيها المساكين
حلونى من ذنبكم
ما تعلقوش حلمكم بيّا
أنا سكه مقفوله لا رايحه ولا جايه
يأيها المساكين
كونوا انفجار الغضب
كونوا انتفاض الحياه والطين
وما تكونوش مساكين.


==========
أهمية العيشة بقلب جامد!
ممكن جداً إنك تنتحر لو زهقت من حياتك
لكن افرض إنك بعد ما مت حسيت إنك برضه لسه تعبان
ساعتها هتعوز ترجع تانى للحياه عشان تحسبها من جديد
وحتحاول أكيد إنك تقابل حد م الملايكه المسؤولين
وبعد ما تتمرمط روحك وتطلع عنيك
ممكن جداً ملاك منهم يقابلك علشان يمسخرك ،ويقولك إنك بتستهبل،
ومش عارف إنت فين وبتكلم مين؟
فى الحاله دى حتعقل وتتراجع عن طلبك المستحيل ،وتطلب حاجه معقوله
زى مثلاً إنهم يعملولك ندب لمدة يومين ف الجنه ،تحس فيهم إنك بنى آدم من لحم ودم
ومن حقك تاكل وتشرب وتنام وتتفسح ،من غير ما تسأل ده بكام وده بكام؟
حا ياخدوا طبعاً بياناتك ويقولولك "انتظر بره لغاية ما نفحص حالتك"
وبعد ما تنشف م البرد وم الحر ويعدى عليك على الأقل يجى كده قيمة سبع تلاف سنه،
حيبلّغوك إن طلبك مرفوض،
والسبب طبعاً البلاوى المسّيحه اللى إنت عملتها ف الدنيا
زى مثلاً.. علبة الملبن إللى انت اشترها لمامتك فى عيد الأم
وبعدين اتسحبت وخدتها وقفلت على نفسك جوه الدولاب،
وكلتها حته حته ومكا فكش ده كمان، فقعدت تلحس السكر اللي ف الورق.
ولا العيش اللى أخدته م الفرن لما كنت طالب ف "الزقازيق"
وخلّصت القرشين اللى بعتهم أبوك ع السنيما والسجاير، يومها ضحكت على صاحب الفرن
وبعد ما أخدت العيش، أخدت كمان بقيت الجنيه اللى انت أصلاً ما دفعتوش
ده غير بقى البنت اللى انت بوستها تحت السلم، بعد ما حلفتلها بكل أيمانات المسلمين
إنك ناوى تجوزها بمجرد ما تنجح فى أولى ثانوى..
يعنى كل فضايحك حتلاقيها قدامك بالتفصيل المخزى الممل.
ساعتها حا تتأكد إن فيه مواضع حركه واتصال بين الدنيا والأخره
وان الشبكه العنكبوتيه والإنترنت اللى هناك متصله مباشرة
بالشبكه العنكبوتيه والإنترنت اللى هنا
وحا تعرف بقى سيادتك إن الانتحار مش حل خالص
وإن الخايب والغلبان فى الدنيا، أكيد حا يكون خايب وغلبان ف الآخرة
وان ما فيش حل غير انك تلغى فكرة الانتحار م الأصل،
وتبتدى تعيش بجد ،وبقلب جامد، وبمنتهى العنف
لغاية ما تموت موتة ربنا وانت صاحى أو وانت نايم
ويا سعدك يا هناك
لو السر الإلهى طلع منك وانت صالب عودك وواقف على رجليك.





==========







يا شاعر

مين اللى قال الشعر بيضرك
الشعر بيخلصك من صوت اللى ساكنين فيك
بيبعدك عن خوفك ويقربك منك
تنده على طيور السما تنزل على كفوفك
على قد اخلاصك يفتح عليك ربنا ويديك
قادره القصيده تنجدك م الموت





===========






أنا مين؟

أنا ماشى ورايا
أنا ضلى
أنا محض خيال مهزوز
وصغًير جداَ بس عجوز
ويجوز وحدانى
يجوز متجوز جوز
عايش عيشة غم
وعايش عيشة أراجوز
ميت على نفسى م الضحك
وضارب بوز

يا اخوانا ان كنتم شايفنى قلولى انا مين؟
ولا انتم مين؟
يا اخوانا الظاهر اننا كلنا مش عارفين
نايمين قايمين
مجرد ضل ردود أفعال
خيبه ومحض ضلال











==========


أنا مش مع أي حد


أنا مش مع أي حد
لأن أي حد ممكن يضيعني في أي وقت
ممكن يبعنى فى أى حته
انا حتى مش معايا لأنى معرفنيش قوى
عشان كده من الأفضل إنى أعيش بين لحظه والتانيه
يعنى مثلاً اقدر أقول دى الوقتى وانا فى كامل قوايا العقليه
إنى ضد احتلال الروح وانى مع حرية العصافير
وكفايه قوى الكلمتين دول،
عشان كل حاجه ما تاخدش اكبر من حجمها
ولا اكتر من وقتها
لأنى مش عارف إيه اللى بعد شويه ممكن يتخلق جوايا
يعنى احتمال أكون أنا صياد العصافير
أو الشيخ اللى بيفتى على نور القمر
واتجاهات الريح والسفن
وبعدها مش مستحيل أبداً ان قلبى يكون وطن
أو انى اموت شهيد
عشان مجرد كلمه ف نشيد.








=====



غلط


ساعات كتير باكون غلط
وافتح ف قلبى بوابات
عشان ألم المطرودين ف الشوارع
واللى واقعين م البيوت
وف كل مرة باكتشف
ان اتسرق من قلبى حاجه
وانى اتمليت دخان عوادم سيارات واكوام زلط
وبقيت على استعداد اموت
أو انى اسيبنى فى أى حته واختفى.







===




يجرى الفرات للجنوب

يجرى الفرات للجنوب
إيه غير صراخ اليتامى يشدّنا للفرات؟
-محناش صحاب مصلحه ولا احنا كنا اخوات
-مالناش ولاد لسه ف سن الجيش
-ولا احنا غاويين انتحار
-الحرب إيه غير ساحة موات ودمار
كثبان رمال وجماجم
-إحنا مجرد حلم بالخُضره
مضروب علينا حصار الفقر والسخرة
ومندورين للهلاك بأمر رب الجنود.
يجرى الفرات والنيل ف عكس الإتجاه يجرى
ما كانش ليه ف العراق ضفتين
ولا نخلتين طارحين وبيت من طين
النيل ماكانش هناك بإراده
كل الحكاية أُجره أكبر شويه
والبحر مهما يفيض يحب الزياده
لكن اللى ميت غريب مالوش ديه
ولو سألت ابنك يرد عليك:-
-لو كان وطن واحد ما كنتش اغيب
وكنت أسيب دمى يحّنى الشط
على شرط نبقى زى بعض بالظبط
ما يكونش واحد غنى وفقرا كُتار.
_أموت معاك ازاى وعمرى عايش ميت
وعمرى عايش يدوب برقع توب قديم من توب؟
يجرى الفرات للجنوب ويجرى دجله معاه
والنيل ف قلب الصحرا عاكس الاتجاه
وكأننا مش ولاد بلاد واحده
لا حاربنا ف فلسطين ولا غنينا للوحده
كأننا جايين من كل حدب وصوب
يجرى الفرات للجنوب والطيارات فوقه
خايفه يمد إديه يمّتى فيهزنى شوقه ياخدنى هناك
أنا المحسوب ف جيش تانى
العسكرى المجنون قسمنى على نفسى وغمّانى
لا بقيت مع ولا ضد
ولا اكتفيت م الضحك ساعة الجد
أنا اللى كنت زمان بنيت السد
ورفعت راية العروبه
حاسس كإنى عبارة عن طوبة
ولو انى ديماً بافتح الراديو
على نشرة الأخبار.



===
















شايف

شايف دم متعبى فى براميل مكتوب عليها نفط خام
نهرين متجرجرين ورا دبابات اسرائيلى
طريق برى بين قاعدة جوانتانمو و الدار البيضاء
يا رب الفقراء
ياإما تسيب ولوحاجه واحده ف مكانها عشان يبقى فيه سبب للانتحار
يا إما تساعدنى اكتب نشيد جديد من غير ما احس انى كداب
خصوصاً لما أقول إن فيه عيال نفسهم يبقوا شهدا وبس
بغض النظر عن احتمال دخولهم الجنه
أو دخول أمهاتهم السجن بتهمة انتاج أسلحة دمار.
يا رب الفقراء
ارفع سطوة طيران ولاد يعقوب عن سمانا
عشان عيالنا تلعب فى الشوارع من غير ما نخاف ان العمارات تطربق على دماغهم
بدون أى ذنب غير انهم عرب ومؤمنين بعيسى ومحمد وعمر ابن الخطاب وجمال عبد الناصر





===



شوق شديد للحريه

أنا كنت عايش وحدانى
فجأه نادانى
حنان من البر التانى
حسيت برغبه مليانى
أطب واغطس جوه النيل
يا إما تغرق أحزانى
يا إما اغرق وابقى قتيل.

يكفينى إنى حاولت أكون
فىنظرة العاقلين مجنون
فىلحظه اغير سير الكون
بإحسساتى العفويه
ساكن وبتحرك مسكون
بشوق شديد للحريه.







===



الثورة

أنا مش أسير رغيف مش نضيف يوسخلى دمى
من بز أمى رضعت العناد حتى الثماله
وماترضنيش الحاله لو عوجه
الثوره بنت الحلم.. فن وعلم مش هوجه
أنا شلتها على قلبى من بدرى
وفتلت حبل الشيله م التعب والعتل
جايز تكون قادر تدشدش عضمى
لكن حيفضل تراب قبرى يهددك بالقتل.














=====







بأمر رب الجنود

متقسمه الألحان
بين وسط رقاصه
وكاس خمره على تربيزه فى الفندق
وقصايد الشعر مشنوقه على حبل ممدود
بأمر رب لبجنود
مابين لا ظوغلى وميدان سليمان.

















===





بقلب حديد

انت النبيل المكتفى بالشعر
بتعيش بحس شوقك للحياه
تمنى نفسك باحتمال بكره
عندك ولد.. شبه الأمل
وبنت شبه الحنان
وعشان كده بتخش جوه الأربعين بقلب حديد
وعشان كده حتفوت وراك كل العقد
وتموت سعيد.





=====















الله أكبرعليكم

يا مغلوبين بالعمى والجهل
والكدب راية وسيف ف سجن العقل
مانتوش غلابه
كتير عددكم زى الفيران ف الخرابه

كفرت بيكم زهقت من ضعفكم
ريقكم بيجرى على إزازة الكوكاكولا
أول ما يضرب مدفع الأسطول
هوه اللى مات فى رام الله مش منكم؟
هوه اللى مات ف العراق ما ماتش بإديكم؟
الله أكبر عليكم
الله أكبر عليكم شيوخ عرب أعراب
داست شرفكم أمريكا وسففتكوا التراب
وقعدتكم جميعاً على العُكاز
ولسه برضه السلام استراتيجى
والدم أرخص عندكم م الجاز؟





=========


ما فيش اجوان

الحزب الحاكم أرحم والا الإخوان؟
الحزب الحاكم بيمارس طغيانه علىأكلك،شربك،لبسك
لكن الإخوان بيمارسوا الطغيان على قلبك ، روحك ،فكرك
وان جيت للحق ،أنا مش طايق الاتنين
ولذلك قررت أخش ف جلدى لغاية مايبانلى صحاب اشتراكيين
آه اشتراكيين هوه انا عكيت
قصدك يعنى ان انا مادريتش بخيبة السوفيت
آه شيوعيين.. هوه
لأ طبعاً دارى.. أنا قصدى اشتراكيين
مصريين من طينتى
فايتين على كل حكاية أنا فايت فيها سنتى بسنتى
مش يعنى عيال أحزاب حسب الأحوال
مرة ف كشف السلطة ومرة ف كشف العمال
أهو دول لا مؤاخذة ألعن وأضل سبيلاً م الحزب الوطنى والأخوان
دول زى الجرب اللى بيلزق على روح الإنسان
يعنى مالوهش دهان
يعنى ان صابك قرى على نفسك
أو أقولك اقلع لبسك واجرى. اجرى
جايز تتجنن ..جايز حتى تموت
على كلن أحسنلك أحسن ما تعيش شر..
شر..إيه؟ شر..إيه؟
شرفت القاعدة يا بيه خليك مبسوط مستعجل ليه؟
كل الأحزاب الوطنية ف الحفلة بتلبس سواريه
وبترقص على لحن العسكر
دى الوقتى نلم فلوس من بعض ونسكر
دى الوقتى العالم يصغر.. يصغر
ويخش معانا الأوضه ويصبح سهل
وقابل للتغيير
بس اتأكد يا طرمبه إنك لما تفوق
حتلاقى انك لسه أسم الله عليك متربع على إيه؟
على إيه؟ .. قولى انت أصل انا مخنوق
أصل اللى مايتسماش حصل زورى
بقيت مكتوم من تحت ومن فوق….

الحزب الوطنى . الشيوعيين. الإخوان.
الله يخرب بيت لعيبة الكورة .. مافيش اجوان

===ا











===







القناة بتاعة السويز

عدا منها الإنجليز
قلنا دليسيبس اللى خان
يا وطن صحرا ومعيز
مى اللى عدا الأمريكان؟
مين مولس ع المارينز؟
مين مدلس؟ مين جبان؟
فى كلام قبيح يغيظ
برضه بفلت م اللسان
لما تبقى دماغنا ( ...)!
يبقى فاضل إيه كمان
حد يربطلى القفيز
قبل ما اغلط فى فلان
وادخل السجن اللذيذ
يعلقونى م (الودان)
واطلع اهتف للعزيز
بعد ما يصبنى الجنان
عدا منها الإنجليز
يعنى جت ع الأمريكان

العجين قبل الخبيز
لسه ما أنش الأوان
يبقى ناكل بكلاويز
محنا مبقلناش سنان


=====



حنفاوض تانى

حنفاوض تانى
حنبلع حسرة موتك يا وفاء*
واحنا بنمضى الأوراق
وندين إرهاب البعث العربى
لما الطيران يضرب بغداد
حنفاوض تانى
جبل الرحمه يمد إديه يحضن صهيون
وشارون راح يبنى فوق عرفات هيكل سليمان
حنفاوض تانى
ماعادتش الحرب حتنفعنا
الأمه قعدت قدام الدش وماحدش راح يسمعنا
حنفاوض تانى
ونتبادل أنخاب الببيبسى ونشكر كرم الأعداء
اللى دخلوا الحرب وهما عارفين
ان امواتهم مقتولين وامواتنا بعون الله أحياء
شكراً ليهود فرعون ويهود صهيون ويهود الضلمه
إدنوا ف الأدنى وسابولنا الخير
استوطنوا أراضينا وبيوتنا وهدومنا
واحنا استوطنا الملكوت الأعلى
فى وطن الجنه بعيد عن مرمى نيران الأسطول

حنفاوض تانى بس المرة دى
حنطالب وبشده بزيادة أعداد الشُهدا
وبسرعة نقل ملفات أولادنا
علشان يلحقوا مدارسهم .. فوق!!!
_____
· الشهيدة وفاء إدريس
· كتبت ردا على مبادرة قمة بيروت وأعيد نشرها ردا على المبادرات التى يبرع العرب فى إطلاقها بعد كل عدوان إسرائيلى على أراضينا


======

بيان غير هام من واحد عايز ينام

أيها الأخوة
ما عادش نخوه
إرادتنا رخوة
عايزه فياجرا
شوف إيه بيجرى قدام عنينا
شارون مطلع "لسانه" لينا
إيه اللى فاضل؟ خلاص حنخلع؟
مش راح نناضل؟
بقى لينا دوله كسبنا جوله وخسرنا جوله!
لسه محاوله والكمبيوتر يقلب أتارى
يا عم دارى دى الخيبه حلت
شوطه وما خلت
على رأى سومه
عايزنا نرجع قول للحكومه
بلاش تحاربى الكلام بشومه
والشومه بينى وبين السفاره
علم الصهاينه فوق العماره

علم الصهاينه مغروز ف "طينى"
مع إن هما بيسبوا دينى
ويدوسوا قدسى بجزمه ميرى
ينقح عليا بالليل ضميرى
والصبح أهدى
بينى وبين اليهود معاهده
وليا لقمه عند الحكومة



=======
نص الوطن عسكر
إلى روح محمد السقا شهيد مظاهرات تأييد انتفاضة الأقصى فى مدينة الإسكندرية

يا قلب شاعر فى مسيرة الجامعة
يا خدك حماس الشعر
تهتف كأنك حى
كل البلاد تسمعك
ومصر مش سامعه
مخنوقه بين ضلمتين
وانت بتنزف ضى
نص الوطن عسكر ونصه عبيد
بتخبى روحك ليه تروح لبعيد
دمك هدر يا محمد السقا
هتفت للقدس ماحلمتش تجيب شقه
عشان كده بتموت عشانها شهيد
بتموت يا واد من غير ما تسأل حد
بتموت ومتهيألك انك واخدها بجد
مجاش فى بالك يا واد
اسكندرية و رام الله تحت نفس الحصار؟
جيش الدفاع هوه فرق الأمن
مافيش خجل ولا احساس قوى بالعار
دم الشهيد لو للكرامه حن
تتفك عقدتنا بأغنيه!!










===

أشباهُُ عوادينا

يا نائح الطلح
أشباه عوادينا
أبو بدله ميرى اعتلى
ورجل الكرسى ف عنينا
يؤمر ويتأمر كأنه خلقنا
يوم ما حكم فينا
عايز ينسينا تاريخ وجعنا
وجوعنا وعطش أهالينا
والمغدورين من ولادنا
فوق رمال سينا
يا نائح الطلح مد إديك لأيادينا
ده اللى ابتلانا بمرض
قادر ينجينا.













====

مولانا

قابلت مولانا وكان لابس بنطلون ف البنك
سألته يا شيخنا المبجل ليه عيشتنا ضنك
مولانا رد بمنتهى الحكمه وقال :-
إيه يا فندى هوه شغل عيال
الفقر أحسن للفقير م المال
والحمد لله الموبايل ف إيد الكل
-مولانا مش معقول! مش انت مولانا؟
والله فكرتك"إيهاب توفيق"


آمنت بيك يا خالق الساده والألوان
كما خلقت ساده وعبيد وشيوخ "كومباتبل"
تلبس لكل مناسبه لبس جديد!










======


يوم الزيطه
يتحك جلد الحيطه
يوم الزيطه
شلبيه تلبس برنيطه
وتقابل المسئول
... ….
زمن عجيب يا ست ،
فديو وانترنت
بس العقول بتشت
من ساندوتش الفول
... ...
والوادّه ماهوش قليل
مع إنه لسه عيل
واخد لقب "منّيل"
وحايز ع القبول
... ...
والوادّه إدارى لكن
ماسك كل الأماكن
متحرك شكله ساكن
وتاعب دول ودول
... ...
والوادّه مسّلّكاتى
عكنن يا ناس حياتى
كأنه يا ناس حماتى
فى كل شىء يقول
... ...
والوادّه مالتى سيستم
عمال بطال بيشتم
وان قبضوه بيكتم
يدلدل ف الديول
... ...
والوادّه واد متين
ودماغه دماغ كهين
ومجمع الحلوين
حواليه ف الكنترول
... ...
وتخينه المسئوليه
لكنك محتويه
كل الأمور دهيّه
وجاهزه بالحلول
... ...
ويا عينى يا بلدنا
على الجهل اللى سادنا
أكيد حاسد حسدنا
فتاهت الأصول.











====
المدرسين كمان مرة

يا مستر إذا ما الجنيه هد حيلك
ولخبط صباحك ف عصرك وليلك
صعود السلالم نزول الكرامه
فى بعض الفصول كنت واقف بِدِيلك
وما اقصدش حد "عوض" أو "سلامه"

سالم ومجدى وعبد العزيز
ومحمود وسيد وأشكال تغيظ
إعارة وشطارة وتدريس فى فيلا
وتدريس فى حاره
صعود السلالم وطالع ونازل
عجين أو خبيز
وجايز يدرس وجايز يفلس
يركب أفيز
وممكن يبيع "السديرى"
ويقلبها "جينز"
وينسى ان ابوه ف الغيطان استوى
عشان يلقى حق الرغيف والدوا
وحق الكتاب، عشان البعيد يبقى تيتشر

ويمشى فى وسط البلد يتعنتر
ويلوى رقبته ويعوج لسانه
وينسى ان لولا البلد كان زمانه
ورا حماره عرجه بينقل سِباخ.
========

أنا مصرى عجيب

انا مصرى عجيب
شّيلت المعزه ولاد الديب
عجبتنى القافيه هرشت قفايا
فتّحت عنيّه برغم عمايا
وعمايا ف رزق اليوم مطلوب
ما انا باكل واشرب بالمقلوب
من يوم ماتولى الأمر الموت
وحكمنى الحاكم بالنبوت
ولقيت الفقر بيجرى ورايا
رتبت الحال على عكس هوايا
أنا مصرى عجيب
وعجيب استعجب منى وقال
مذلول وبيرقص للزلزال
مسكين ومحمل حمله عيال
فانقطع الصوت/ واتهد الحيل
واتهز الأريال مال ع السور
المعزه بتنطح قرن الطور
والطور بيميل
ويشد الحبل ويرخى الديل
والديل دلدول
ما هو مش معقول
معلول متشال شايل محمول
افهمنى ياخال
راديو التوظيف قطع الإرسال
والشركه سرّحت العمال
شطّبت فلوس
وبقيت بلبوص
مستعجب ليه!
قرص الطعميه بربع جنيه!
========
رباعيات ومربعات
***
بلاد تجيب الاكتئاب
فيها العجايب..عجيبه
نصيب لكل نصّاب
ولكل مخلص..مصيبه
.....
علف التيوس يجى بسهوله
بس اللى عالف،سانن السكاكين
إعدل دماغك وافهم الفوله
فيه ناس مواشى وناس جزارين.
......
فيه ناس مواشى وناس جزاريين
وكان زمان فيه ناس بشر
كانوا تلات أصناف مافضلش غيرصنفين
المذلولين بالرغيف، واللى قلوبهم حجر.
.......
ما اقدرش اقول آه
ولا اقدر اقول لأ
مهزوم أمام الحياة
دخلت جوه الشق.
........
دخلت جوه الشق رعب وخوف
أنا اللى كانت أمى دعيالى
بقيت اكيف نفسى حسب الظروف
وبقيت سجين يومى ورزق عيالى.
........
حينمّروا الجزم وكل سنه تجديد
برسوم جديده وفحص ومخالفات
والمشى ف الشارع حيبقى بالمواعيد
بخط سير معتمد وبإذن م السلطات.
...........
بخط سير معتمد مختوم بختم النسر
علشان دواعى الأمن، حرصاً على الانتاج
وعشان ولاد الإيه يتفسحوا ع الجسر
من غير ما صوت الجزم يعملهم ازعاج.
.........


العجل طب وكترت السكاكين
مسكين لا حيل ولا حيله
فرحت ليه لما وقع صدام حسين
مع إنه شبهك ومن نفس الفصيله.


أنا قلبى عريان وحافى
وجلدى توبى ولحافى
شفتونى والع جريتم
وماجبتوليشى المطافى.
...................
اعقلها يابن الناس وبطل كلام
لازم تكون ف المعركه فتوه
كل شافطين دمنا اولاد حرام
واللى خدوه قوه ما يرجعش الا بالقوه.
................................

هانت عليك الدنيا ناوى تموت
ويكفنوك ف العراق بالعلم
يستقبلوك الملايكه ف الملكوت
وتفوت عيالك مقهورين حسره وألم.

====================


يا بخت أمك يا ياسين

أهل اليسار اتعثروا
واتيسروا أهل اليمين
شدوا حبالهم وافتروا
واستهتروا بالمحرومين
السهرانين يستنظروا
الديك يبيض
والميه تنزل م الحديد
والكدب يعلن انه تاب
اهل اليمين متدينين
مايبطلوش أكل الكباب
يا رب عينهم يا معين.

أهل اليسار دول ملعونين
بيهوهوا زى الكلاب
مالهم ومال المسلمين؟
لوحتى إن الديك ما بضش
والكدب تاب أو ان ما تابش
الفقرا هما الكاسبانين
ليهم على جوعهم ثواب
الجنه حدف بدون حساب
والشايبه راح ترجع شباب
يا بخت أمك يا ياسين.


==================



قلبى معاك
(إلى رأفت سيف)

كان البُنا لسه طالع وفجأه اتهد
خيط المصالح بيلضم خرز الاتفاق
بعض اللى كانوا ف يوم من الأيام رفاق
باعوا احتمال الفرح
بالرقص والتهريج ف زار الحكومة
وانت رفضت العزومة
وقلت "جرح الوطن لسه حى
انا مش هغير ملامحى لا شتا ولا صيف"
بقت السياسه مواسم رزقهم
وازاى حتفلت بقى من كدبهم يا شريف
قلبى معاك ضدهم،بس قلبى ضعيف.


الفلاحين كانوا فين
والحزب على ندْها
والحزب كان فين
والفلاحين مطرودين م الغيطان
مين اللى كان زيك على جمرة الأحزان بيتقلب
والكدابين لابسين طواقى النصب ف البورصه وف البرلمان؟
بيكتفوها يخصخصوها يمصمصوها
يرقصوها ف عز ميتمها
واللى حكمها كتمها ونام مبسوط
-دكان كبير من مارينا حتى نجوع أسيوط
أو دكانين مفتوحين على بعض
زى النكته ما بتقول
ياعم " رأفت" جاوبنى
ليه العقل متجنن والجنون معقول؟
ليه اتحكم للظلم ف الجلسه ومات الضمير
وعلى لسانى أنا اتقفل باب المناقشه
انا اللى غرقان ف العرق وفقير
مسجون ما بين حريتى ورغيف معكر دمى
يا عم "رأفت" رد
وانت اللى سيفك حد
ساعة الجد سيفك بصير
يفرق ما بين الحق والتزوير
من غير ما يقطع وريد الود.
















=========


الله يجازيكم

بكل بلاوى حاضركم و ماضيكم
الله يجازيكم من يوم عرابى لحد مين ياترى؟
"بس اما تيجى وانا احكيلك ع اللى جرا"
على الهزيمه والانكسار والمسخرة

الله يجازيكم "بريح صرصرٍ عاتيه"

تخليكم كما أعجاز نخل خاويه
"وما أدراك ما هي", ثورة ونارها حاميه
لاتبقى ولا تذر, لا ملك ولا رئيس ولا شيخ غفر
إلا من تاب واعتذر,
عما جنته يداه من ظلمٍ ومن عدوان
وساعتها حا نشوف بقى ملوك ورويسا مخلوعين
سارحين بمناديل الورق واللبان
أوشغالين ف الغيطان ومتعاصين زينا ف الطين.
آمين.. آمين.



==








يا كداب

من فين ملامحك واخده شكل الأوليا؟
من فين بتسرق قدرتك ع الكدب؟
وانت اللى عمرك جنب حيط الجيش
خرطوشه فاضيه وكهنة خيش

إيه اللى نجاك والبلاد بتموت؟
مين اللى قواك ع الغيطان والبيوت؟
مين اصطفاك على سهوة ابن الشعب وامه وابوه؟
وايه سر ابتسامتك يا عديم الحس والوطن بيتوه؟



















=======

النشيد الأكيد

لا شاعر ولا نيله
ولا اتعلمت من دنيتى
غير الكلام وقلة الحيله.

يأيها الناس اكرهونى
/كما تكرهون الذين حرفو الوجع النبيل عن مواضعه
وضيعوا الأوطان/
مين اللى قال
الشعر ينجد الإنسان؟!
الشعر ميَت .. يستحق الموت
عشق الوطن بالفعل مش بالصوت
واللى يحب الوطن, يلحق يلم اللى باقى
باقى فدائى/ انتحارى/ شهيد
/أياً ما تدعوا فهو النشيد الأكيد/
من يوم ما بقت الأغانى هيصه كدابه
وبقت تسالى لسباع الوهم ف الغابه
انشق ليل الوطن عن فجر تانى جديد
برقت شموس الفعل
بهتت حروف الكتابه
لما العيال شالت حجاره
ورجمت الدبابه.







ميلاد محمد
حاول الشاب المصرى ميلاد محمد عبور الحدود إلى قلسطين المحتلة للانضمام إلى المقاومة لكن رصاص جنود الاحتلال كان أسرع من انطلاقه نحو الوطن السليب
وكان محمد السقا قد سبق ميلاد حين استشهد فى مظاهرات جامعة الإسكندرية
*****
أسمر سمار نيلى
عطّر شطوط الدلتا
عطّر مناديلى
ميلاد فى عز الموت
جمع الأدان والجرس
مصراوى لحم ودم
وماهمهوش الحرس
***
ميلاد محمد شهيد
ومصر صاحية أكيد
فى الغيط وفى المدرسه
وف ساحة الجامعة
شهيد ينادى شهيد
دق الجرس دَقه
لمحمد السقا
وسمعك يا ميلاد
غنيوة استشهاد
***
ميلاد محمد ما قالشى
لما الكلام بقى كوم
والأقصى بات مهموم
ميلاد عبر سينا
فات عجزنا لينا
وشال أمانينا
وحلمنا ف عنيه
مع إنه مالحقشى
لكن صبح فكرة
تكبر مع بكرة
واكيد مع الإصرار
ملايين كتير أحرار
حا تمشى ف السكه
وتكمل المشوار.
هذا المقال مرفوض نشره فى صحيفة الأهالى دون أسباب واضحة والكاتب يدعوكم للبحث معه عن تلك الأسباب
( الدين لله والوطن للجميع) ليس شعاراً علمانياً
بقلم/ سمير الأمير

الدين لله والوطن للجميع- شعار يتفق مع الإسلام والدعوة إليه أقرب لروح الإيمان إذ( لو أن الدنيا تسوى عند الله جناح باعوضة ما سقى منها الكافر شربة ماء) وأيضاً ( لا إكراه فى الدين قد تبين الرشد من الغى) بمعنى أن الدنيا للكافر والمؤمن على حد سواءأما من يعارضون _ الشعار العظيم لثورة 1919 ويقولون بأن الدين لله والوطن لله فيقصدون أن الدين لهم والوطن لهم _ - وكأنهم يحملون توكيلا__ من المولى عز وجل وتنزه عن أغراضهم وعمى قلوبهم_ للتحدث باسمه- لأننا إن قلنا أن الوطن لله فسوف لايصبح وطنا حيث لدى المسيحى تصور ولدى المسلم تصور آخر ولدى اليهودى تصور ثالث وبالتالى هى دعوة للطائفية والحرب الأهلية والتشرزم وهذا مايريده أعداء الوطن- و السبب الحقيقىلمهاجمة هؤلاء الذين ينشرون التخلف بين ظهرانينا لشعار ثورة 1919 العبقرى هو أنهم لا يريدون أن يكونوا مثل بقية خلق الله مواطنين عاديين لهم نفس الحقوق وعليهم نفس الواجبات
فهم يهاجمون طه حسين ولويس عوض و نجيب محقوظ ويتطاولون على سلامة موسى ويوسف أدريس وأحمد بهاء الدين بل لم يسلم من افترائهم الأمام محمد عبده وذلك لأنهم يريدون لهذه الأمة أن تتحول إلى أمة من الرعايا الجهلاء - لكى يقودوها إلى التخلف
تحقيقا لأغراض ريعية ومصالح ترابحية باسم مايسمونه الاقتصاد الإسلامى الذى ليس سوى دعوة لقبول الرأسمالية تحت شعارات إسلامية لاترى فى الإسلام مشروعا للعدل والمساوة بل تكريساً للظلم وإعادة انتاج لفكر بنى أمية
ولكن هيهات هيهات _ إنهم واهمون ولا يجب أن يفرحوا كثيرا لكون أفكارهم المتعصبة القميئة تنتشر فى هذا الجو العفن- لأن الحرية ستكنسهم كالأوراق الذابلة__ إن دعوتهم للحكومة الدينية لا تخدم سوى مصالح إسرائيل فهى دولة دينية عنصرية وقميئة مثلهم تماما وهى تشجع مشروعهم عبر استفزازهم مرة عن طريق الرسوم الكاريكاتورية ومرة عن طريق بابا الفاتيكان وبذلك يسهل للإسرائيلين أن يدعوا أننا نعاديهم لأنهم يهود وليس لأنهم محتلون وقتلة، كما يسهل لأمريكا الاستمرار فيما تسميه الحرب على الإرهاب_ إذ هى بحاجة لعماهم وتعصبهم لتتمكن من إقناع العالم أننا وحوش دينية!! ولتتمكن الإدارة الأمريكية من تدمير ما أنجزته البشرية من تراث الحوار والتعايش والتكامل بين الحضارات، إذ العودة لتلك القيم الإنسانية العالمية يقوض رؤيتها للعولمة الجديدة القائمة على أساس تحويل الشعوب إلى قطعان إستهلاكية أو إبادتها إذا لزم الأمر

من هنا أعتقد أنه لابد من العودة الحقيقية لشعار (الدين لله والوطن للجميع)، لأنه لو استمر الحال على ما هو عليه فستكون الحرب الطائفية هى السمة الأساسية فى كثير من الدول العربية والحل يكمن فى التأكيد على مبدأ المواطنة الذى يجب أن يحتكم إليه الجميع ويكفى ما نراه فى العراق بين أبناء الدين الواحد من السنة والشيعة وعلينا أيضاً أن نتوقف عن خداع أنفسنا ونعترف أن لدينا مناهج فى مدارسنا تحض على كراهية أهل الأديان الأخرى باعتبارهم محرفين وأنا لا أعنى مطلقاً أن نتخلى عن عقائدنا إرضاءً لبعضنا البعض فليكن كل منا كما يريد ولتحتفظ كل طائفة بمشروعها الخاص وبمرجعيتها ولكن عليها حين تتقدم ببرامج سياسية أو تربوية أن تقدم مشروعها العام لا أن تعمم مشروعها الطائفى
أذكر فى هذا السياق أننى حضرت درساً فى إحدى مدارس اسكتلانده وكان المدرس يشرح المذاهب المسيحية بمنتهى الحيادية لدرجة أننى لم أعرف أثناء شرحه إلى أي المذاهب ينتمى هو نفسه وبعد انتهاء الدرس عرفت أنه بروتستانى وسألته إن كانت حياديته سمة شخصية فقال أن الأديان تدرس بموضوعية دون أن يعرب المعلم عن معتقداته الشخصية ..
علينا إذن أن نعترف بالخلل الذى يؤدى إلى غياب روح التسامح وإشاعة الكراهية بين أبناء الوطن الواحد إذ لا مناص من قبول اختلاف المعتقدات الدينية والأراء السياسية على أنها طبيعة الحياة وسنة الخالق الذى لوشاء لجعلنا أمة واحدة وعلينا أن نشرع من الآن فى الكفاح المشترك ضد ثقافة الاستبداد السياسى والدينى على حد سواء ومن هنا تبرز أهمية مقرطة الحياة بكل جوانبها فى بلداننا العربية
غير أن ذلك لا يعنى القبول بالنموذج الطائفى للديموقراطية الذى يكرس للانقسام أكثر مما يكرس للمواطنة بمعناها الحداثى ، ذلك النموذج البشع الذى ترعاه الولايات المتحدة وتباركه فى العراق ولبنان والذى تسعى لتعميمه فى مصر والسودان بدعوة حماية الأقليات. إذ أن هذا المشروع الأمريكى يهدف إلى تفكيك البنى المادية والثقافية فى المنطقة دون الاهتمام ببناء أى بديل لأن كل البدائل لا تتناسب مع ذلك المشروع فالبديل الإسلامى المستنير يشكل خطراً على الدولة العبرية والبديل القومى قد شكل تهديداً لتدفق النفط ونهب ثروات الوطن العربى والبديل الديموقراطى الحقيقى يهدد عملاءها فى المنطقة وبالتالى لا يتفق أيضاً مع مصالحها التى ارتبطت بالفاسدين الطفيليين ممن يطلق عليهم زوراً رجال الأعمال هؤلاء الذين ينشرون الخراب أينما حلوا ويقومون بتبوير الوطن وتفكيك البنى الاقتصادية التى بنيت بعرق الشعب فى الستينيات.
فهل آن الأوان لكى نعى كل هذه المخاطر المحدقة بوجودنا ذاته ولكى نسعى لوأد الفتن مبتعدين عن الأساليب الأمنية والقمعية التى لاتؤدى سوى لخلق حالات احتقان جديدة وذلك بالعمل المشترك بين كل الأطياف العرقية والدينية والسياسية من أجل الاتفاق على مشروع للوطن يعى أن العلمانية لم تكن حرباً ضد الدين ولكنها كانت حلاً عبقرياً لإعلاء مبدأ المواطنة والأنتماء و بديلاً لهدر الدماء والكراهية بين أبناء الأرض الواحدة
ويبقى أن نعترف أن طاقة العنف هى مكون طبيعى فى النفس البشرية ولكن علينا أن نوجه تلك الطاقة تجاه الأعداء الحقيقين لوطننا العربى وإلا" فالنار تأكل بعضها إن لم تجد ما تأكله"